ਤੇਲ ਅਵੀਵ: ਇਜ਼ਰਾਈਲ-ਹਮਾਸ ਵਿਚਾਲੇ ਲਗਾਤਾਰ 25 ਦਿਨਾਂ ਤੋਂ ਜੰਗ ਜਾਰੀ ਹੈ। ਇਸ ਜੰਗ 'ਚ ਹਮਾਸ ਤੋਂ ਇਲਾਵਾ ਲੇਬਨਾਨੀ ਅੱਤਵਾਦੀ ਸੰਗਠਨ ਹਿਜ਼ਬੁੱਲਾ ਵੀ ਇਜ਼ਰਾਇਲੀ ਫੌਜ 'ਤੇ ਹਮਲੇ ਕਰ ਰਿਹਾ ਹੈ। ਹੁਣ ਤੀਸਰਾ ਫਰੰਟ ਇਸ ਜੰਗ ਵਿਚ ਉਤਰਨ ਜਾ ਰਿਹਾ ਹੈ। ਜੋ ਕਿ ਯਮਨ ਦਾ ਕੱਟੜਪੰਥੀ ਸੰਗਠਨ ਹੈ। ਹਾਉਤੀ ਬਾਗੀਆਂ ਨੇ ਅਧਿਕਾਰਤ ਤੌਰ 'ਤੇ ਇਜ਼ਰਾਈਲ ਵਿਰੁੱਧ ਅਤੇ ਫਲਸਤੀਨ ਦੇ ਹੱਕ ਵਿੱਚ ਜੰਗ ਦਾ ਐਲਾਨ ਕੀਤਾ ਹੈ। ਹਾਉਥੀ ਬਾਗੀ ਸਰਕਾਰ ਦੇ ਪ੍ਰਧਾਨ ਮੰਤਰੀ ਅਜ਼ੀਜ਼ ਬਿਨ ਹਬੂਤਰ ਨੇ ਕਿਹਾ ਕਿ ਅਸੀਂ ਆਪਣੇ ਲੋਕਾਂ ਨੂੰ ਗਾਜ਼ਾ ਵਿੱਚ ਮਰਨ ਲਈ ਨਹੀਂ ਛੱਡ ਸਕਦੇ।

ਹੂਤੀ ਬਾਗੀਆਂ ਨੇ ਧਮਕੀ ਦਿੱਤੀ ਹੈਕਿ ਜੇਕਰ ਗਾਜ਼ਾ 'ਚ ਜੰਗਬੰਦੀ ਨਾ ਹੋਈ ਤਾਂ ਇਜ਼ਰਾਈਲ 'ਤੇ ਹੋਰ ਬੈਲਿਸਟਿਕ ਮਿਜ਼ਾਈਲਾਂ ਦਾਗੀਆਂ ਜਾਣਗੀਆਂ। 2014 ਵਿੱਚ, ਹੂਤੀ ਨੇ ਯਮਨ ਦੀ ਰਾਜਧਾਨੀ ਸਮੇਤ ਦੇਸ਼ ਦੇ ਵੱਡੇ ਹਿੱਸੇ ਉੱਤੇ ਕਬਜ਼ਾ ਕਰ ਲਿਆ। ਟਾਈਮਜ਼ ਆਫ਼ ਇਜ਼ਰਾਈਲ ਨੇ ਹਾਉਤੀ ਸਮੂਹ ਦੇ ਬੁਲਾਰੇ ਯਾਹਿਆ ਸਾਰਿਆ ਦੇ ਹਵਾਲੇ ਨਾਲ ਕਿਹਾ ਕਿ ਇਹ ਹਵਾਈ ਹਮਲੇ ਗਾਜ਼ਾ ਦੇ ਲੋਕਾਂ ਪ੍ਰਤੀ ਧਾਰਮਿਕ, ਨੈਤਿਕ, ਮਾਨਵਤਾਵਾਦੀ ਅਤੇ ਰਾਸ਼ਟਰੀ ਜ਼ਿੰਮੇਵਾਰੀ ਦੀ ਭਾਵਨਾ ਨਾਲ ਕੀਤੇ ਗਏ ਸਨ, ਜੋ ਇਜ਼ਰਾਈਲੀ ਬੰਬਾਰੀ ਕਾਰਨ ਵਧ ਰਹੇ ਮਨੁੱਖੀ ਸੰਕਟ ਦਾ ਸਾਹਮਣਾ ਕਰ ਰਹੇ ਹਨ। ਸੋਮਵਾਰ ਨੂੰ ਯੇਰੂਸ਼ਲਮ ਵਿੱਚ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਈਰਾਨ ਉੱਤੇ ਯਮਨ ਤੋਂ ਇਜ਼ਰਾਈਲ ਉੱਤੇ ਸਟੀਕ-ਗਾਈਡਿਡ ਮਿਜ਼ਾਈਲਾਂ ਲਾਂਚ ਕਰਨ ਦੀ ਤਿਆਰੀ ਕਰਨ ਦਾ ਦੋਸ਼ ਲਾਇਆ।

1980 ਦੇ ਦਹਾਕੇ ਵਿੱਚ ਯਮਨ ਵਿੱਚ ਹਾਉਥੀ ਉੱਭਰਿਆ। ਇਹ ਸ਼ੀਆ ਮੁਸਲਮਾਨਾਂ ਦਾ ਸਭ ਤੋਂ ਵੱਡਾ ਕਬਾਇਲੀ ਸੰਗਠਨ ਹੈ। ਹਾਉਥੀ ਅਬਦੁੱਲਾ ਸਾਲੇਹ ਦੀਆਂ ਆਰਥਿਕ ਨੀਤੀਆਂ ਤੋਂ ਨਾਰਾਜ਼ ਸਨ, ਜਿਸ ਨਾਲ ਯਮਨ ਦੇ ਉੱਤਰੀ ਖੇਤਰ ਵਿੱਚ ਅਸਮਾਨਤਾ ਵਧ ਗਈ ਸੀ ਅਤੇ ਸਾਲ 2000 ਵਿੱਚ ਹਾਉਥੀ ਨੇ ਇੱਕ ਨਾਗਰਿਕ ਸੈਨਾ ਬਣਾਈ ਸੀ। ਅਬਦੁੱਲਾ ਸਾਲੇਹ ਦੀ ਫੌਜ ਨੇ 2004 ਤੋਂ 2010 ਦਰਮਿਆਨ ਹਾਊਥੀਆਂ ਨਾਲ ਕੁੱਲ 6 ਜੰਗਾਂ ਲੜੀਆਂ। 2011 ਵਿੱਚ ਅਰਬਾਂ ਦੇ ਦਖਲ ਕਾਰਨ ਇਹ ਜੰਗ ਰੁਕ ਗਈ ਅਤੇ ਕਰੀਬ ਦੋ ਸਾਲ ਤੱਕ ਗੱਲਬਾਤ ਚੱਲਦੀ ਰਹੀ। ਪਰ ਕੋਈ ਹੱਲ ਨਹੀਂ ਨਿਕਲਿਆ।

ਇਸ ਤੋਂ ਬਾਅਦ ਹਾਊਤੀ ਵਿਦਰੋਹੀਆਂ ਨੇ ਸਾਊਦੀ ਅਰਬ ਸਮਰਥਿਤ ਨੇਤਾ ਅਹਿਮਦ ਰਾਬੋ ਮਨਸੂਰ ਹਾਦੀ ਨੂੰ ਸੱਤਾ ਤੋਂ ਬੇਦਖਲ ਕਰ ਦਿੱਤਾ ਅਤੇ ਯਮਨ ਦੀ ਰਾਜਧਾਨੀ ਸਨਾ 'ਤੇ ਕਬਜ਼ਾ ਕਰ ਲਿਆ। ਹਾਉਤੀ ਕੋਲ ਜੋ ਸੈਨਿਕ ਹਨ, ਉਹ ਟੈਂਕਾਂ, ਐਂਟੀ-ਟੈਂਕ ਗਾਈਡਡ ਮਿਜ਼ਾਈਲਾਂ, ਲੰਬੀ ਦੂਰੀ ਦੀਆਂ ਬੈਲਿਸਟਿਕ ਮਿਜ਼ਾਈਲਾਂ ਅਤੇ ਇੱਥੋਂ ਤੱਕ ਕਿ ਤਕਨੀਕੀ ਵਾਹਨ ਚਲਾਉਣ ਦੇ ਸਮਰੱਥ ਹਨ। ਪਿਛਲੇ ਵੀਰਵਾਰ ਹਾਉਤੀ ਨੇ ਇਜ਼ਰਾਈਲ 'ਤੇ ਮਿਜ਼ਾਈਲ ਦਾਗੀ ਸੀ। ਹਾਲਾਂਕਿ ਇਜ਼ਰਾਈਲ ਨੇ ਇਸ ਹਮਲੇ ਨੂੰ ਰੋਕ ਦਿੱਤਾ ਹੈ।